介紹完喺坐月期間點樣補氣血同埋開刀坐月有咩需要注意之後，另一個好多新手媽媽關心嘅問題就係「排惡露」。惡露係指喺產後排出身體嘅分泌物，每位媽媽喺生完BB之後都會排惡露。有好多媽媽或者會覺得已經生完BB，唔使再點樣護理私密部位，所以就掉以輕心。但其實惡露排出嘅過程有好多隱憂，處理得唔好嘅話可能會不停流惡露、肚腹位置疼痛、子宮瘀血內阻，有機會影響下次懷孕，甚至造成細菌感染之類嘅後遺症，問題可大可小，所以新手媽媽應該花啲功夫好好處理惡露問題。
惡露是什麼？
惡露係指喺產後排出身體嘅分泌物，例如係胎膜、胎盤組織、脫落嘅子宮虹膜，一般會持續大概2至6個禮拜。惡露可以分為三個階段，初期嘅惡露係鮮紅色嘅，而且有一啲血塊，大概會持續3至4日，然之後會慢慢變成紫色或者啡色，形態亦會變成漿糊狀，大概持續半個月左右。隨住時間推移，惡露會愈嚟愈少，白血球亦都會慢慢增加，變成白色嘅液體狀。
排惡露喝什麼？
1. 生化湯
生化湯係好多醫師都大力推薦嘅排惡露中藥配方，有促進子宮收縮、散瘀止血同溫經止痛嘅功效，可以針對新手媽媽要排清惡露同埋瘀血積聚喺肚腹位置嘅問題。生化湯主要有五種藥材，包括桃仁、當歸、川芎、炮薑同炙甘草。桃仁性平味辛，炮薑性溫味苦，兩者都有活血袪瘀、溫經止血嘅作用；當歸同川芎性溫味甘，可以行氣調經；而炙甘草可以調和五種藥材，加強溫經活血嘅功效，有助排走惡露，亦都可以治療積瘀血、子宮疼痛、惡露不行等等嘅衍生問題。
順產媽媽可以喺產後第3日開始飲，每日一帖，飲7至10日。而開刀媽媽可以喺產後一個禮拜、排完氣之後飲，都係每日一帖，但飲5至7日就夠。生化湯唔可以飲太多，產後兩個禮拜之後就唔好再飲，飲得太多反而會窒礙子宮內膜嘅復原，所以要適可而止。
2. 廿八方
廿八方第一方係生化湯嘅加減方，都係傳統嘅排惡露中藥配方，經過專家調配，更加適合體虛嘅新手媽媽。兩者同樣含有當歸頭、川芎、桃仁、炙甘草同炮薑五種藥材，有頭先講過嘅活血袪瘀、行氣調經功效，幫助排清惡露，而且仲有白背木耳等等嘅藥材，白背木耳含有豐富嘅鐵質同鈣質，可以增加血紅素同修復子宮，令媽媽嘅身體可以儘快復原。而且廿八方係針對新手媽媽喺坐月期間嘅所有需要，除咗排惡露之外，其餘四方可以調理身體嘅其他部位，全面補身、補血氣，同埋增強免疫力抵禦風寒，成效亦都非常顯著，絕對係新手媽媽嘅產後調理恩物。
成個廿八方藥療係要食28日，順產媽媽應該喺生完之後嘅第4至7日開始飲第一方，而開刀媽媽就可以喺第8至12日開始飲，視乎翻每位媽媽排惡露嘅時間。飲完第一方之後就順序繼續飲落去，直至飲完成個藥療配方。
3. 益母草水
益母草水有別於上述嘅兩款藥療，屬於食療，係一種針對新手媽媽需要嘅清惡露湯水嚟。益母草，亦即係坤草，性微寒、味苦辛，有宮縮、化瘀嘅功效，可以活血、祛瘀同調經，專門治療惡露不盡、產後出血等一啲新手媽媽會面對嘅產後不適，絕對係婦科良藥，亦都因為咁而有「益母草」呢個花名。媽媽只係需要將一撮益母草加滾水，煲5至10分鐘就飲得，簡單方便。
新手媽媽可以喺產後第一個禮拜嘅平補期開始飲，但同樣唔可以飲太多，因為益母草具有一定藥性，會造成肌肉抽搐之類嘅情況，如果飲得太密可能會對身體造成虧損，而且藥性帶寒，身體特別虛弱嘅媽媽要注意飲用。就算身體好強壯，大概3至4日飲一次就夠。
4. 山楂紅糖水
雖然山楂同紅糖都係比較常見嘅食材，但功效絕對拍得住益母草水，而兩者都同樣係專門治療產後不適徵狀嘅排惡露湯水。山楂性溫味酸甘，有活血化瘀嘅功效；紅糖性溫味甘，可以補氣養血，而且有宮縮作用，令胎盤組織儘快化成瘀血、排清惡露。
山楂同紅糖雖然性溫，但對身體冇咩副作用，新手媽媽可以喺產後第一個禮拜日日飲都冇問題。
關於惡露嘅謬誤
1. 部份排惡露食物其實唔應該食
網上面有啲人話坐月期間應該食多啲阿膠、薑同酒，有助排清惡露，但其實呢三種排惡露食物係唔應該食嘅。
首先，阿膠係大補之物，雖然可以補充身體流失嘅氣血，對媽媽復原身體有幫助。但係喺產後頭一兩個禮拜身體較為虛弱，唔適宜大補。而且如果惡露流量多嘅話，好可能係因為子宮收縮得唔好，或者子宮入面有胎盤組織殘留。未排清惡露就進食阿膠補身，有機會令惡露殘留喺體內，導致惡露不盡，所以喺惡露排清之前都儘量唔好食阿膠。
又有啲講法係話煲排惡露湯水嘅時候可以落啲薑絲，除咗可以調味之外，薑仲有祛風驅寒嘅功效，刺激子宮收縮，有助惡露排出。但其實喺產後初期係唔應該食薑嘅。薑性溫熱，喺新手媽媽身體未完全復原嘅時候唔適宜進食呢啲燥熱食物，容易出現發燒、胃酸倒流，甚至大量出血嘅情況。而且太早食薑會令子宮過度收縮，打亂媽媽身體復原嘅進度。產後媽媽可以改用砲薑，熱性比薑或者乾薑低，溫補散寒之餘，刺激性同時又細啲，比較適合產後服用。
有人亦都會推薦飲豆腐釀酒湯，或者喺生化湯度加酒，因為酒有活血功效，但其實酒同時會助濕熱、行血動經，同薑一樣有機會造成出血問題，令排惡露嘅情況惡化，所以喺產後坐月期間應該禁酒。
2. 排惡露傷口唔使護理？
有好多新手媽媽見到網上面話順產造成嘅陰道撕裂傷唔使特別照顧，亦都可以直接掂水，所以就唔理佢。無錯，雖然正常嚟講個傷口係唔使點樣護理都會好翻，但流出嚟嘅惡露可能會感染到個傷口，所以喺坐月初期都唔可以完全唔理，需要護理一吓傷口。
喺坐月頭一個禮拜，去完廁所之後，可以簡單沖洗一吓私密位置。兩個禮拜之後惡露會開始變少，咁就唔需要洗得咁密，可以等有惡露嘅時候先清洗。喺坐月初期可以用一啲夜用型衛生巾，大概每2至3個鐘換一次，避免惡露長期罨住，同埋避免細菌感染。惡露開始減少嘅時候就可以轉用普通衛生巾，再少啲嘅時候就用護墊，等到大概6個禮拜之後就唔需要再墊。
注意事項
1. 產後初期應該堅持哺乳，因為身體持續分泌母乳可以刺激催產素分泌，促進子宮收縮，加快將胎盤組織排出身體嘅時間，快啲將惡露排清晒。
2. 新手媽媽應該儘量少食寒性食物，例如生果、凍飲呢啲都唔得，因為身體仍然未復原，氣血虧虛，呢啲寒涼食物會窒礙氣血流動、傷脾胃，亦都會令惡露同瘀血冇辦法排出體外，所以坐月期間唔適宜食太多寒性食物。
3. 如果惡露有臭味、顏色變深、出現瘀塊、流量不斷增多，又或者排惡露超過一個月，呢啲都係異常情況，好可能係子宮或者陰道受到感染，應該儘早去醫院檢查求醫。
